LEKEITIOKO DANTZAZALE EGUNA 2026ko maiatzaren 9a Lekeitio, musika eta dantzaren herria Lekeitio herri bizi eta kulturalki aberatsa da, eta bere historian zehar musika eta dantzak presentzia berezia izan dute herriko b...
LEKEITIOKO DANTZAZALE EGUNA
2026ko maiatzaren 9a
Lekeitio, musika eta dantzaren herria
Lekeitio herri bizi eta kulturalki aberatsa da, eta bere historian zehar musika eta dantzak presentzia berezia izan dute herriko bizitzan. Tradizio horren adibide dira, besteak beste, emakumeen aurreskua, Kaixarranka, Estudiantina, txistularien jarduna edo herriko musika banda.
Bestalde, Lekeitiok lotura berezia du euskal kulturaren ikerketarekin ere. Hemen jaio zen Resurrección María de Azkue, euskal musikaren eta ahozko tradizioaren ikertzaile eta biltzaile nagusietako bat, eta haren lanari esker euskal ondare musikalaren zati handi bat gaur arte iritsi da.
Testuinguru honetan kokatzen da Lekeitioko Dantzazale Eguna, herritarrek dantzaz gozatzeko eta herriko plaza dantzaz betetzeko sortutako ekimena.
Helburua argia da: Lekeition dantza partekatua sustatzea, belaunaldi guztiek elkarrekin dantzatzeko aukera izan dezaten.
Dantzazale Eguna: herri osoarentzako festa
Dantzazale Eguna dantza eta musika tradizionalaren inguruko jai irekia da, dantza gustuko duten guztiei zuzendua, dantzari izan ala ez.
Ekimena Lekeitioko Udalaren ekimen moduan aurkeztuko da, herriko kultur dinamika indartzeko eta plaza publikoan dantza partekatua sustatzeko.
2026ko edizioa berezia izango da, izan ere:
AIKO Taldearen 20. urteurrenarekin bat egingo du
ETBk ekitaldiaren grabaketa berezia egingo du
Horrek aukera emango du Lekeitioko giroa eta dantza tradizioa Euskal Herri osora zabaltzeko.
AIKO Taldea eta Lekeitio
AIKO Taldea musika eta dantza tradizionaleko profesionalen taldea da, eta 2006tik Euskal Herriko ondare musikala eta koreografikoa ikertu, berritu eta zabaltzen ari da.
Bere ibilbidean:
5.000 ikasle baino gehiago igaro dira AIKOren dantza eskoletatik
12 disko grabatu dituzte
jota dantzari buruzko dokumental bat ekoitzi dute
karbono-zuntzezko danbolin berritzaileak diseinatu dituzte
ehunka erromeria, jaialdi eta ikastaro egin dituzte
Lekeitiorekin harreman berezia du taldeak, izan ere urte askotan dantza eskolak eman izan ditu Azkue Ikastolan, eta herrian ikasle, lagun eta dantzazale ugari ditu.
Horregatik, 20. urteurrena ospatzeko antolatzen ari den ekimen berezi hau Lekeition egitea proposatu du, herriarekin duen lotura azpimarratuz.
Aurretiko dantza tailerrak herrian
Dantzazale Eguna ez da egun bakarreko jaia izango. Helburua da herritarrek aurretik dantzak ikasi eta prestatzeko aukera izatea, ondoren plazan denek elkarrekin dantzatzeko.
Horretarako, AIKO Taldeak dantza tailer irekiak eskainiko ditu aurreko asteetan, eguerdiko 12:00tan Herriko Plazan (eta eguraldi txarra balego eleizako aterpean)..
Tailerren egunak
- Apirilak 11
- Apirilak 18
- Apirilak 25
- Maiatzak 2
Tailer hauetan ikasitako dantzak maiatzaren 9ko jaian bertan dantzatuko dira.
2026ko maiatzaren 9ko egitarauaren proposamena
13:00 – Dantzaldi ibiltaria
AIKO Taldea eta lagunekin, Kofradi ingurutik hasi eta plazaraino.
15:00 – Bazkaltzeko etena
17:00 – Bazkalondoko kantaldi eta dantzaldiak
- AIKO Taldea
- Lekeitioko estudiantina
- Roberto eta Miren Etxebarria
- Jarauta 69 txaranga
- Bizkaiko Gaiteroak
- Malen eta Andere Zobaran
- Rakel Pujana
- Argi Zameza
21:00 – Larrain dantza eta agurra
Ekitaldian Lekeitioko kultur taldeek ere parte hartzea aurreikusten da, hala nola Estudiantinak.
Telebista grabaketa
Egun osoa Euskal Telebista-k grabatuko du, Bideografik ekoiztetxearen bidez.
Grabaketa honek aukera emango du:
*Lekeitioko giroa eta ondare kulturala zabaltzeko
*herriko dantza tradizioa erakusteko
*plaza publikoan sortzen den giro parte-hartzailea islatzeko
Ekimenaren helburuak
- Lekeitioko plaza dantzarako gune bizi bihurtzea
- Herriko dantza eta musika tradizioak balioan jartzea
- Belaunaldi desberdinak dantzaren bidez elkartzea
- Lekeitio euskal dantza tradizionalaren mapan kokatzea
- Herriko kultur eragileen parte-hartzea sustatzea
