19:00 Herriko Plaza. ZEANURI. GORBEIA SUZIEN
Gorbeia Suzien
Gorbeia Suzien lasterketa Suzien Mendi Klubaren bitartez Gorbeia eta bere ingurunea era erraz eta dibertigarri batean ezagutarazteko saiakera da. Gorbeiako gurutzeko ohiko bideak albo batera utzi eta ezezagunagoak diren bide eta tontor batzuk erakustea da gure helburua. GS mendia eta lasterketak maite ditugun Suzien Mendi Klubekook Zeanuriko Udalaren laguntzarekin antolatu dugun mendi-lasterketa da.
Horretarako, galduak ziren eleizbide zahar batzuk ere berreskuratuko ditugu. Gure bazter eta txoko zoragarriak ezagutarazteko, natura kirolarekin lotzea modu jasangarri eta aproposena dela uste dugu.
Zergatik Gorbeia inguruan? Gu bertan bizi garelako eta esku artean dugu altxor hau zuekin partekatu nahi dugulako.
Gorbeia Naturgunea Bizkaiko hego-ekialdean dago. Bizkaia eta Araba banatzen dituen mugarria izateaz gain, inguruko punturik altuena ere bada Gorbeiako tontorra (1481 metro).
Zeanurin hasi eta Gorbeiako tontorrak zeharkatu eta gero, berriro ere hasierara bueltatuko da gure lasterketa. Zeanuri, hedapenari dagokionez Bizkaiko hirugarren herririk handiena izan arren, 1300 biztanleko herri xumea da. Lasterketak, egun batez, pizteko eta biziberritzeko aukera emango dio gure herri lasaiari.